ብቸኝነት በጤና ላይ የሚያመጣው ጉዳት

ብቸኝነት (loneliness) ብቻዬን ነኝ፣ ከሰው ተለይቻለሁ የሚል የሚያስጨንቅ ስሜት ነው። ብቻቸውን የሚኖሩ ሁሉ ብቸኝነት አይሰማቸውም፤ በሰዎች መካከል ሆነውም ብቸኝነት ሊሰማ ይችላል። አንዳንዴ ብቸኝነት መሰማት የተለመደ ነው፤ ብዙ ጊዜም ያልፋል።

ብቸኝነት ከበረታ ወይም ለረጅም ጊዜ ከቆየ ግን ጤናን ሊጎዳ ይችላል። ጥናቶች ብቸኝነትን ከድብርት (depression)፣ ከጭንቀት (anxiety)፣ ከደም ግፊት (high blood pressure)፣ ከልብ በሽታ፣ ከበሽታ መከላከል አቅም መቀነስና ከማስታወስ ችሎታ መቀነስ ጋር ያያይዙታል። ብቸኝነት የሰውነትን የጭንቀት ምላሽ (stress response) ለረጅም ጊዜ ሊያስነሳ ይችላል።

ለትምህርት ወይም ለሥራ ከቤተሰብ ርቀው የሚኖሩ፣ ወደ ውጭ አገር የሄዱ፣ ልጆቻቸውን ለመጠየቅ የመጡ ወላጆች፣ ሕመም ያለባቸውና አረጋውያን የበለጠ ለብቸኝነት ሊጋለጡ ይችላሉ።

• ለሚያምኑት ሰው ይደውሉ ወይም መልዕክት ይላኩ፤ በየጊዜው ማድረግን ልማድ ያድርጉ።
• የድሮ ጓደኞችን ያግኙ፤ የቤተሰብ የስልክ ቡድን ይፍጠሩ።
• በቤተክርስቲያን፣ በመስጊድ፣ በማህበር ወይም በበጎ ፈቃድ ሥራ ከሰዎች ጋር ይገናኙ።
• የሚወዱትን ነገር በቡድን ያድርጉ፤ ለምሳሌ የእግር ጉዞ ወይም ስፖርት።
• እንቅልፍዎን፣ አመጋገብዎንና እንቅስቃሴዎን ይጠብቁ።
• ብቸኝነትን በአልኮል፣ በሲጋራ ወይም በጫት ለማስታገስ አይሞክሩ።
• ሌሎችን ይጠይቁ፤ "እንዴት ነህ? እንዴት ነሽ?" መባባል ብቸኛ የሆነን ሰው ሊያግዝ ይችላል።