በሰገራ ደም መታየት፦ የደሙ ቀለም ምን ይነግራል?

በተለመደው ሁኔታ ከሰገራ ጋር ደም መውጣት የለበትም። ከፊንጢጣ የሚወጣ ደም (rectal bleeding) በአንጀት ውስጥ የሆነ ችግር እንዳለ ያሳያል። ትንሽና አንድ ጊዜ ብቻ የታየ ደም ብዙ ጊዜ ከባድ ባይሆንም ምክንያቱ መታወቅ አለበት።

የደሙ ቀለምና አወጣጡ ከየት እንደሚመጣ ፍንጭ ይሰጣል። ከሰገራ በኋላ በሽንት ቤት ወረቀት ላይ የሚታይ ደማቅ ቀይ ደም ብዙ ጊዜ ከፊንጢጣ አካባቢ ይመጣል፤ ለምሳሌ ከኪንታሮት (piles, haemorrhoids) ወይም ከፊንጢጣ መሰንጠቅ (anal fissure)። ከሰገራ ጋር የተቀላቀለ ደም ከአንጀት ውስጥ ሊመጣ ይችላል። ጥቁር፣ እንደ ቅጥራን የሚጣበቅ ሰገራ ደግሞ ከላይኛው የአንጀት ክፍል ወይም ከጨጓራ የሚመጣ መድማት ሊሆን ይችላል።

ደሙ "ኪንታሮት ብቻ ነው" ተብሎ መታለፍ የለበትም። የአንጀት ፖሊፕ (polyp)፣ የአንጀት ቁስለት (colitis) ወይም የአንጀት ካንሰር (bowel cancer) ተመሳሳይ ደም ሊያሳዩ ይችላሉ። ብዙ ሰዎች ኪንታሮት ወይም አሜባ ነው ብለው ቆይተው ካንሰሩ ከገፋ በኋላ ይመጣሉ።

• ደሙ መቼ እንደጀመረ፣ ቀለሙንና ምን ያህል ጊዜ እንደሚታይ ይመዝግቡ፤ ለሐኪሙ ይጠቅማል።
• ሆድ ድርቀትን (constipation) ለመከላከል ውሃ በብዛት ይጠጡ፤ አትክልት፣ ፍራፍሬና ጥራጥሬ ይመገቡ። ሲጸዳዱ አይግፉ።
• ኪንታሮት ወይም አሜባ ነው ብለው በራስዎ ተደጋጋሚ መድኃኒት አይውሰዱ። ምክንያቱ በምርመራ ይታወቅ።
• ደም የሚያቀጥኑ መድኃኒቶችን የሚወስዱ ከሆነ ያለ ሐኪም ትዕዛዝ አያቋርጡ፤ ግን ስለ መድማቱ ቶሎ ይንገሩ።