በእግር ጣቶች መካከል የሚያሳክክ ፈንገስ (አትሌትስ ፉት)

አትሌትስ ፉት (athlete's foot) በእግር ቆዳ ላይ የሚከሰት የተለመደ የፈንገስ ኢንፌክሽን ነው። ብዙ ጊዜ የሚጀምረው በእግር ጣቶች መካከል ሲሆን ይህ ዓይነቱ በሕክምና ቋንቋ ቲኒያ ኢንተርዲጂታል (interdigital tinea) ይባላል። ስሙ "የስፖርተኛ እግር" ቢሆንም ማንኛውንም ሰው ሊይዝ ይችላል።

ፈንገሱ ሞቃትና እርጥብ ቦታ ይወዳል። ስለዚህ ላብ የሚያልብ እግር፣ የታፈነ ጫማ፣ እንዲሁም ከታጠቡ በኋላ በደንብ ሳይደርቅ ካልሲና ጫማ የተደረገበት እግር ለፈንገሱ ምቹ ነው። ከሰው ወደ ሰው በቀጥታ ንክኪ ወይም በጋራ በሚጠቀሙባቸው እርጥብ ወለሎች፣ ፎጣዎችና ጫማዎች ይተላለፋል።

በራሱ ብዙ ጊዜ አይድንም። ሳይታከም ከቆየ ቆዳው ሊሰነጠቅና ሊቆስል፣ ወደ ጥፍርም ሊዛመት ይችላል። ቀደም ብሎ ሲታከም ግን በአብዛኛው በቀላሉ ይሻሻላል።

• እግርዎን በየቀኑ ይጠቡ፤ በተለይ በጣቶች መካከል ሳያሹ በቀስታ ተጭነው በደንብ ያድርቁ።
• እግር ሙሉ በሙሉ ሳይደርቅ ካልሲና ጫማ አያድርጉ።
• ካልሲዎን በየቀኑ ይቀይሩ፤ ጥጥ ካልሲ ይመረጣል።
• ለእግርዎ የተለየ ፎጣ ይጠቀሙ፤ አዘውትረው ያጥቡት።
• አንድ ዓይነት ጫማ በተከታታይ ቀናት አያድርጉ፤ ጫማዎችን እያቀያየሩ እንዲደርቁ ያድርጉ።
• የሚያሳክከውን ቆዳ አያኩ፤ ወደ ሌላ የሰውነት ክፍል ሊያዛምተው ይችላል።
• በፋርማሲ የሚገኙ የፀረ ፈንገስ ክሬም፣ ስፕሬይ ወይም ዱቄት አሉ። በፓኬቱ ላይ ያለውን መመሪያ ይከተሉ ወይም ፋርማሲስት ይጠይቁ፤ ሁሉም ለሁሉም ሰው (ለምሳሌ ለልጆች) ተስማሚ አይደሉም።
• ምልክቱ ከጠፋ በኋላም እግርን የማድረቅና የንፅህና ልማዱን ይቀጥሉ፤ ተመልሶ ሊመጣ ይችላል።