የራስ ቆዳ ፈንገስ (ቆረቆር) በልጆች፦ ምልክቶችና ሕክምና

ቆረቆር ወይም የራስ ቆዳ ፈንገስ (tinea capitis) በራስ ቆዳና በፀጉር ላይ የሚወጣ የፈንገስ (fungus) ኢንፌክሽን ነው። በብዛት የሚይዘው ልጆችን ነው፤ ነገር ግን አዋቂዎችንም ሊይዝ ይችላል። ስሙ "ringworm" ቢባልም በትል አይመጣም።

ቆረቆር ተላላፊ ነው። ከሰው ወደ ሰው፣ ከእንስሳት (በተለይ ድመትና ውሻ) እንዲሁም በማበጠሪያ፣ በኮፍያ፣ በፎጣና በትራስ ልብስ ሊተላለፍ ይችላል።

ብዙ ወላጆች ፎረፎር ወይም ድርቀት መስሏቸው ዘይት ወይም ቅባት ይቀባሉ፤ ይህ ፈንገሱን አያጠፋም። ሳይታከም ከቆየ አልፎ አልፎ ቋሚ ጠባሳ ሊተው ይችላል፤ ጠባሳ ባለበት ቦታ ደግሞ ፀጉር ተመልሶ ላያድግ ይችላል።

• ቆረቆር ከተጠረጠረ ቤት ውስጥ ብቻ ለማከም አይሞክሩ፤ ልጁን ሐኪም ያሳዩ።
• ዘይት፣ ቅቤ ወይም የስቴሮይድ ቅባት በራስዎ ግምት አይቀቡ፤ ፈንገሱን አያድኑም።
• ማበጠሪያ፣ ብሩሽ፣ ኮፍያ፣ ፎጣና ትራስ ልብስ አያጋሩ።
• የልጁን ማበጠሪያና የፀጉር ጌጦች በደንብ ያጽዱ፤ ፈንገሱ በእነሱ ላይ ሊቆይ ይችላል።
• የታዘዘውን የሚዋጥ መድኃኒት ልጁ ቢሻለውም ሐኪሙ እስካዘዘው ቀን ድረስ ይስጡ። ቶሎ ማቋረጥ በሽታው ተመልሶ እንዲመጣ ያደርጋል።
• ሐኪሙ ካዘዘ የቤተሰብ አባላት የፀረ-ፈንገስ ሻምፖ ይጠቀሙ።