በልጆች ፊት ላይ የሚወጣ ቢጫ ቅርፊት ያለው ቁስል (ኢምፔቲጎ)

ኢምፔቲጎ (impetigo) በባክቴሪያ (bacteria) የሚመጣ የቆዳ ላይኛ ክፍል ኢንፌክሽን ነው። በልጆች ላይ ከሚታዩ የቆዳ ኢንፌክሽኖች በጣም የተለመደው ነው፤ ነገር ግን በማንኛውም ዕድሜ ሊይዝ ይችላል። ብዙ ጊዜ ፊት ላይ፣ በተለይ በአፍና በአፍንጫ ዙሪያ፣ እንዲሁም እጅ ላይ ይወጣል።

ኢምፔቲጎ በጣም ተላላፊ ነው። በቆዳ ንክኪ፣ እንዲሁም በፎጣ፣ በአልጋ ልብስና በልብስ ይተላለፋል። ባክቴሪያው ብዙ ጊዜ በቁርጥ፣ በጭረት፣ በነፍሳት ንክሻ ወይም እንደ ኤክዜማ (eczema) እና እከክ (scabies) ባሉ የቆዳ ችግሮች የተጎዳ ቆዳ ውስጥ ይገባል።

ብዙ ጊዜ ከባድ በሽታ አይደለም፤ በሕክምና በጥቂት ቀናት ውስጥ ይሻላል። ሳይታከም ከቆየ ግን ወደ ሌላ የሰውነት ክፍልና ወደ ሌሎች ሰዎች ሊሰራጭ፣ ለሳምንታት አዲስ ቁስል ሊያወጣና አልፎ አልፎ ወደ ቆዳ ጥልቀት ገብቶ ጠባሳ የሚተው ቁስል (ecthyma) ሊያመጣ ይችላል።

• ቁስሉን በሳሙናና በውሃ በቀስታ ያጥቡ፤ በደንብ ያድርቁ።
• ቁስሉንና ቅርፊቱን አይንኩ፣ አያኩ ወይም አይፈንቅሉ፤ መስፋፋቱንና ጠባሳን ይከላከላል።
• ቁስሉን በፋሻ ወይም በጋዝ ይሸፍኑ።
• እጅዎን ደጋግመው ይታጠቡ፤ በተለይ መድኃኒት ከመቀባትዎ በፊትና በኋላ።
• ፎጣ፣ አንሶላና ትራስ ልብስ አይጋሩ፤ በሙቅ ውሃ ያጥቧቸው። የልጆችን መጫወቻ በሳሙናና በሞቀ ውሃ ያጽዱ።
• የታዘዘውን መድኃኒት ቁስሉ መሻሻል ቢጀምርም እስከ መጨረሻው ይጠቀሙ።
• ልጁ ተላላፊ እስካልሆነ ድረስ ከትምህርት ቤት ወይም ከመዋዕለ ሕፃናት ቢቀር ይመከራል። በሕክምና ብዙ ጊዜ ከ48 ሰዓት በኋላ አያስተላልፍም።